1） 以前讀書而家返工都係，一定要有少量音樂先可以集中精神做野。如果環境太靜，反而我會開始遊魂專心唔到。我曾經嘗試喺圖書館讀書，速度奇慢，所以都係唔再勉強自己，返屋企繼續。
2）最近迷上睇日本推理小說，會返工放工搭車嗰陣睇。睇過東野圭吾，伊坂幸太郎同埋宮部美幸既作品。到目前為止最愛宮部美幸既《樂園》。
3) 除咗推理小說之外，最近開始睇番日劇。之前終於睇咗阿妹大力推介既《螢之光》同《Love Shuffle》。為咗爭取時間，有數集係返工放工喺地鐵睇既，不過其實幾辛苦。因為《螢之光》既綾瀨遙太好笑，喺地鐵笑又好怪，所以忍笑忍得好辛苦。今季日劇追緊《Boss》，《愛與寬恕》，《The Quiz Show》同《名偵探的守則》。
4）同事介紹咗大陸搜狐既輸入法軟體《搜狗》，非常好用。《搜狗》係用拼音輸入法，不過妳一路打佢會一路估妳想講既野，所以大大減少要揀字既時間。當妳用得夠耐，妳就咁打拼音既第一個英文字佢就會估到妳想講既野。仲要有齊繁簡體互換，打個shift就變番英文輸入法呢啲咁方便既功能，簡直係學唔識倉頡/速成既人（即係我）既救星。
5）每日放工番屋企要第一時間梳洗、食飯，務求有成晚時間hea。
6）熱愛攝影，但討厭入鏡。每次出街都為咗帶400D定LC-A掙扎一番。
7）少用facebook，因為(a) 唔鍾意啲application叫妳invite其他人（有時仲幫妳tick嗮全部朋友） (b) layout越來越 user unfriendly, (c) 唔鍾意陳年影既相而家俾人tag番出黎，但係remove tag又好似好衰。
8）愛用豆瓣，因為 (a) 好多書評，影評，碟評睇，有啲寫得非常好，(b) 可以認識好多興趣相近既朋友（因為豆瓣會顯示妳同其他人都有睇過聽過既戲，書同cd。），(c) layout簡單，容易用，(d) 好多小組。有啲雖然無聊但係都有人認真討論，(e) 可以用呢個途徑搵多啲唔同書，戲同碟聽。
9）成日自言自語。
10）鍾意食野，亦鍾意去試新地方，不過稍微欠缺行動力。就咁睇《U Magazine》同《Hong Kong Walker》既介紹就好開心。時不時會留意openrice既介紹。
11）就算突然興起去試新地方，因為未去過唔敢帶人去，所以通常都係自己一個人去“試菜”，好味先同朋友去。
12）差不多每個星期都會食一次日本菜。因為日本菜有好多種（居酒屋，壽司，燒肉，串燒，拉麵，咖哩，天婦羅...），所以一定唔會厭。
13）鍾意睇戲，但基本上對大製作興趣不大。以前會覺得要約人睇戲，但係而家為咗唔想錯過啲戲，又唔想約黎約去麻煩，會寧願自己睇。
14）非常討厭睇戲時其他人傾計。每一次都想叫佢唔好再講，但係因為得自己一個人又唔係好敢出聲。
15）唔容易信人。但係一旦覺得呢個朋友值得交，就會信任對方。
16）鍾意參加人數少既聚會，因為唔擅長應付一大班人，除非大家都係熟人。
